Ítrekuð aðvörun vegna neyslu skelfisks úr Eyjafirði

Mælingar á eitruðum þörungum og þörungaeitri sýna að enn er mikil hætta á PSP eitrun við neyslu á skelfiski úr Eyjafirði.  Sýni voru tekin 21.júní og greindust þörungar af  tegundinni Alexandrium,  sem valda PSP eitrun, þrefalt yfir mörkum og PSP eitur í kræklingi mældist tífalt yfir viðmiðunarmörkum.

Áhrif PSP-eitrunar ("Paralytic Shellfish Poisoning") á spendýr eru í því fólgin að eitrið truflar natríumbúskap taugafruma, sem leiðir af sér truflun á taugaboðum og getur valdið lömun, öndunarerfiðleikum og jafnvel dauða. Þessi gerð þörungaeitrunar hverfur úr skelfiskinum á skömmum tíma eftir að þörungar hafa horfið af hafsvæðinu.