Útflutningur hrossa
Útflutningur hrossa þarf að uppfylla:
Skilyrði
Nokkur skilyrði þarf að uppfylla áður en hross eru flutt út. Þau helstu eru:
- Hrossið skal vera örmerkt
- Hrossið skal hafa hestavegabréf
- Tilkynna skal útflutningshross til Matvælastofnunar
- Útflytjandi skal hafa aðgang að Traces gagnagrunninum og vera skráður í hann
- Dýralæknir á vegum útflytjanda skal færa í vegabréfið útlitsauðkenni hestsins
- Opinber eftirlitsdýralæknir skal skoða hestinn fyrir útflutning
- Matvælastofnun skal gefa út heilbrigðisvottorð fyrir hvert hross
Hestavegabréf
Forsenda fyrir útgáfu vegabréfa er að hrossið sé örmerkt. Hestavegabréfið gildir fyrir hrossið sem flutt er úr landi, er gefið út einu sinni og fylgir því alla tíð eftir það. Bændasamtök Íslands gefa út vegabréfin en í þeim eru m.a. upplýsingar um uppruna, ætterni og eigendasögu hestsins. Upplýsingar í bréfið eru m.a. sóttar í WorldFeng.
Útflytjendur hrossa
Áður en hross eru flutt úr landi skal tilkynna þau til Matvælastofnunar. Þar sem útflytjendur skrá þessu að lútandi tilteknar upplýsingar við útflutninginn er þeim nauðsynlegur aðgangur að gagnagrunninum Traces með reikningi (account). Hafa skal samband við Matvælastofnun til þess að fá aðgang að gagnagrunninum (mast@mast.is). Útflytjendum er einnig bent á að kanna innflutningsleyfi fyrir hross hjá viðkomandi yfirvöldum í innflutningslandi ef flytja á hross til þriðju ríkja (ríki utan Evrópusambandsins).
Skoðun dýralæknis á vegum útflytjanda
Fyrir opinbera skoðun skal dýralæknir á vegum útflytjanda færa af nákvæmni útlitsauðkenni hestsins í vegabréfið og lýsa þeim. Ef útlit hrossins breytist skal gefa út nýtt vegabréf um leið og hinu gamla er eytt. Útflytjandi útvegar dýralækni á sínum vegum.
Skoðun eftirlitsdýralæknis
Að loknum störfum dýralæknis á vegum útflytjanda fer fram skoðun opinbers eftirlitsdýralæknis á hrossinu. Hann metur hvort það sé hæft til útflutnings m.t.t. dýravelferðar og heilbrigðis, staðfestir hvort það sé rétt merkt og uppfylli kröfur sem gerðar eru í innflutningslandi. Hann getur hafnað útflutningi á hrossi ef það er ekki talið hæft til útflutnings t.d. vegna heilbrigðis, holdafars eða hreinleika. Eftirlitsdýralæknir staðfestir einnig að hesturinn sé sá sem lýst er í vegabréfinu.
Kostnaður
Kostnað af störfum dýralæknis við færslu útlitsauðkenna í vegabréf greiðir útflytjandi.
Opinber gjaldtaka vegna útflutningsskoðunar og útflutningsvottorða hrossa er skv. gjaldskrá Matvælastofnunar. Útflytjandi greiðir kostnaðinn.
Árstími útflutnings, ástand og aldur hrossa
Á tímabilinu 1. október til 15. maí er einungis heimilt að flytja hross til útlanda með flugvélum. Heimilt er að flytja út hross eldri en 4 mánaða. Óheimilt er að flytja út fylfullar hryssur sem gengnar eru með 7 mánuði eða lengur.
Tölfræði um árlegan útflutning hrossa
Á hverju ári eru flutt út mörg hundruð hross til margra landa, flest fara til landa innan ESB. Upplýsingar um útflutningslönd og fjölda útfluttra hrossa á hverju ári eru birtar í ársskýrslum Matvælastofnunar:
Frekari upplýsingar
Til þess að fá frekari upplýsingar um útflutning hrossa má leita til Matvælastofnunar með því að senda senda fyrirspurnir á mast@mast.is