ESB bannar nokkrar tegundir af úreltum erfðabreyttum nytjaplöntum

Þann 20. mars s.l. var tillaga framkvæmdastjórnar Evrópusambandsins (ESB) um að banna eftirfarandi tegundir erfðabreyttra nytjaplanta þ.e. Bt176 maís, GA21xMON810 maís, Ms1Rf1 olíu repju, Ms1Rf2 olíu repju og Topas 19/2 olíu repju samþykkt í fastanefnd sambandsins um fæðukeðjuna og heilbrigði dýra. Þessar fimm tegundir voru heimilaðar í ESB áður en núgildandi reglur sambandsins um erfðabreytt matvæli og fóður voru settar með reglugerð nr. 1829/2003. Þessi reglugerð hefur ekki ennþá verið tekin upp í viðauka við EES samninginn, en það verður eflaust gert á næstunni og þá mun hún ásamt þeim breytingum sem gerðar hafa verið á henni einnig taka gildi hér á landi. Allar erfðabreyttar plöntur sem voru löglega á markaðnum í Evrópu þegar þessi reglugerð tók gildi máttu vera þar áfram til 18. apríl í ár, en til að mega hafa þær áfram á markaðnum eftir þann tíma þá þurfti að sækja sérstaklega um það til framkvæmdastjórnarinnar. Engar umsóknir hafa borist um áframhaldandi heimild til markaðssetningar þessara fimm tegunda, enda eru þær ekki lengur í ræktun og fyrirtækin sem settu þær á markað hafa ekki lengur áhuga á markaðssetningu þeirra. Auk þess eru ekki til neinar byrgðir af þessum afurðum lengur. Það er þó ekki útilokað að á markaðnum séu afurðir sem eru mengaðar og innihaldi því vott af þessum tegundum. Vegna þess að ekki er hægt að losna við þessa mengun á svipstundu þá mega matvæli og fóður innihalda 0,9% af þessum erfðabreyttu afurðum næstu fimm árin að því tilskildu að um óhjákvæmilega mengun sé að ræða.

Birt á vef Aðfangaeftirlitsins þann 3. apríl 2007