Hamborgarar
Það er viðtekin venja að bjóða upp á mismunandi steikingu þegar um nautasteikur er að ræða. Á hráum kjötstykkjum er örverur að finna á ysta lagi kjötsins en ekki inni í vöðvanum og örverurnar drepast þegar kjötið er steikt eða grillað við háan hita.
Um hamborgara gildir allt annað þar sem þeir eru mótaðir úr hökkuðu kjöti. Örverur eru þá ekki lengur aðeins á yfirborði hamborgaranna heldur dreifðar um þá alla. Létt steiking drepur því ekki sjúkdómsvaldandi örverur sem hugsanlega geta verið í kjötinu. Til þess að drepa hugsanlegar sjúkdómsvaldandi örverur verður að steikja hamborgarana í gegn eða þannig að kjarnhitastig sé a.m.k. 75°C.
Það er mikilvægt að þeir sem bjóða upp á misvel steikta hamborgara geri sér grein fyrir þessu og þeirri ábyrgð sem á þeim hvílir þegar þeir bjóða upp á þessa valkosti.
Ýmsar leiðir eru til að draga úr hættu á að viðskiptavinurinn fái matarsýkingu af völdum sjúkdómsvaldandi örvera í hamborgurum, m.a.:
- Steikja alla hamborgara þannig að kjarnhitinn sé yfir 75°C
- Vera með virkt innra eftirlit sem m.a. felst í að geyma hamborgarana við rétt hitastig fyrir steikingu
- Fara fram á rannsóknarniðurstöður vegna hamborgaranna
Munið að ef kjarnhiti í hamborgurum nær ekki 75°C eru alltaf líkur á að þeir innihaldi sjúkdómsvaldandi örverur