• Email
  • Prenta

Útflutningur gæludýra

Þegar kemur að útflutningi gæludýra þá eru það kröfur viðkomandi móttökulands sem gilda.  

Útflutningur til Evrópusambandsins, Noregs og Sviss

Samræmdar kröfur gilda um innflutning hunda og katta til landa innan Evrópusambandsins, Noregs og Sviss. 

Örmerki: dýrið skal vera örmerkt áður en það er bólusett.

Hundaæðisbólusetning: lágmarksaldur hunda og katta fyrir bólusetningu gegn hundaæði er 12 vikur. Bólusetning skal fara fram a.m.k. 21 degi fyrir innflutning (að mesta lagi ári fyrir). Hafið samband við dýralækni í tæka tíð til þess að panta bóluefni (sérpanta þarf hundaæðisbóluefni fyrir hvert og eitt dýr).

Undanþágur: eftirtalin lönd heimila innflutning óbólusettra hvolpa og kettlinga sem eru yngri en 12 vikna gömul: 1) Austurríki (sækja þarf um undanþágu til dýralæknayfirvalda), 2) Tékkland, 3) Danmörk, 4) Eistland, 5) Litháen og 6) Sviss. Athugið að þessi landalisti getur breyst fyrirvaralítið en uppfærðan lista má sjá hér (dálkur 2, article 11 of regulation (EU) No 567/2013). Slíkur innflutningur er heimilaður ef annað hvort; (a) ræktandi leggur fram yfirlýsingu um að dýrið hafi ekki komist í kynni við dýr sem voru mögulega smituð af hundaæði, eða(b) dýrið er flutt inn ásamt móður sinni sem hefur verið bólusett gegn hundaæði í samræmi við innflutningskröfur. ATH! Þetta gildir eingöngu fyrir þau dýr sem fara á sk. non-commercial vottorði.

Bandormahreinsun: þau lönd þar sem bandormurinn Echinococcus multilocularis finnst ekki, gera kröfu um bandormahreinsun hunda fyrir innflutning. Um er að ræða Noreg, Bretland, Írland, Finnland og Möltu. Þetta skal gera 1-5 sólarhringum fyrir innflutning, þ.e. má ekki gerast á síðasta sólarhringnum.

Útflutningsvottorð: nota skal eyðublöð gefin út af Matvælastofnun eftir fyrirmynd Evrópusambandsins. Dýralæknir fyllir út vottorðið og svo þarf áritun og stimpil hjá opinberum dýralækni, þ.e. hjá Matvælastofnun (Dalshrauni 1b í Hafnarfirði, Austurvegi 64,  Selfossi eða á umdæmisskrifstofum). Vottorð þessi sem eru ígildi evrópska gæludýravegabréfsins veita inngöngu í ESB, Noreg og Sviss í 10 daga eftir útgáfu, og gilda í 4 mánuði fyrir ferðalög innan ESB.

Vottun vegna flutnings hunda/katta til til Evrópu er mismunandi eftir því hvort um er að ræða útflutning dýrsins í fylgd eiganda eða umboðsmanns hans eða ef dýrið eru flutt fylgdarlaust.

Dýrið flutt í fylgd eiganda eða umboðsmanns hans

  • Þegar dýrið er flutt í fylgd eiganda eða umboðsmanns hans skal nota vottorð fyrir sk. „non-commercial movement“.
  • Umboðsmaður eiganda getur verið annar einstaklingur eða fraktflutningafyrirtæki sem hefur skriflegt umboð eiganda. Sérstakur reitur fyrir umboð er á síðu 7 í vottorðinu. 
  • Flutningur dýrsins skal fara fram innan 5 daga frá ferðalagi eiganda/umboðsmanns, þ.e. frá 5 dögum fyrir þar til 5 dögum eftir ferðalag eiganda.
  • Þetta vottorð skal einnig nota ef nýr eigandi (búsettur í ESB/Noregi/Sviss) kemur til Íslands og flýgur með dýrið aftur úr landi. 
  • Nafn eiganda skal skrá bæði í reit sendanda og viðtakanda. Sá sem fylgir dýrinu í flug/skip skal skrifa undir á síðu 7, hvort sem um er að ræða eiganda eða umboðsmann hans.
  • Ítarlegri leiðbeiningar um útfyllingu vottorðsins er að finna hér.  
  • Vottorð vegna útflutnings hunds/kattar (til ESB/EES) í fylgd eiganda eða umboðsmanns hans (non-commercial)

Dýrið flutt fylgdarlaust (eigendaskipti) - vakin er athygli á sérstökum skilyrðum vegna útflutnings hunda og katta til Evrópu þegar eftirfarandi á við

  • dýrið er flutt fylgdarlaust og eigandi ferðast ekki sömu leið allt að 5 dögum fyrir eða eftir flutning dýrs, eða; 
  • eigendaskipti eiga sér stað á sama tíma, eða; 
  • sami aðili flytur fleiri en 5 dýr í einu.

Auk heilbrigðisskilyrða (örmerkingar, bólusetningar gegn hundaæði a.m.k. 21 degi fyrir útflutning og ormahreinsunar í vissum tilfellum) er gerð sú krafa að flutningurinn sé skráður í Traces. Traces er sérstakt skráningarkerfi fyrir viðskipti með dýr/dýraafurðir frá þriðju ríkjum til Evrópusambandslanda. Útflytjandi skal sjá um forskráningu í Traces en að lokinni skoðun hjá dýralækni er skráningin kláruð af Matvælastofnun.

  1. Skrá skal útflytjanda og viðtakanda dýrs í Traces og upplýsingar um flutninginn (part 1). Skráningin getur einungis farið fram af aðila sem hefur aðgang að kerfinu en sum fyrirtæki sem sérhæfa sig í flutningsþjónustu milli landa veita slíka þjónustu. 
  2. Í mesta lagi 48 klst fyrir útflutning skal hundurinn/kötturinn skoðaður af dýralækni. Dýralæknirinn skal fylla út eftirfarandi:
  3. Að minnsta kosti 24 klst fyrir útflutning skal leggja ofangreind gögn fyrir á Markaðsstofu Matvælastofnunar í Dalshrauni 1B, 220 Hafnarfirði svo hægt sé að ljúka skráningunni í Traces. Hafi forskráning ekki farið fram er ekki hægt að ljúka skráningu í Traces og stofnunin getur ekki gefið út vottorð vegna útflutnings. Afgreiðslutími skrifstofunnar er kl. 9-12 og 13-15 á virkum dögum.
  4. ATH! Útflutningur með þessum hætti getur ekki átt sér stað á mánudegi þar sem heilbrigðisskoðun skal fara fram í síðasta lagi 48 klst fyrir útflutning. 

Útflutningur til Bandaríkjanna

Vegna útflutnings á hundum og köttum til Bandaríkjanna þarf dýralæknir að gefa út heilbrigðis- og upprunavottorð þar sem eftirfarandi er staðfest:

- Að hundurinn/kötturinn hafi engin einkenni smitsjúkdóms.
- Að hundurinn/kötturinn hafi verið á Íslandi í a.m.k. 6 mánuði (eða frá fæðingu sé um yngra dýr að ræða)

Æskilegt er að vottorðið sé gefið út í mesta lagi 10 dögum fyrir brottför. Ekki er krafa um að vottorðið skuli áritað af dýralæknayfirvöldum.

ATH! Ekki er krafa um bólusetningu hunda og katta gegn hundaæði vegna flutnings til Bandaríkjanna. Þó gera sum fylki kröfu um hundaæðisbólusetningu og mælt er með því að innflytjendur kanni skilyrði innflutnings á ákvörðunarstað.

Yfirlit yfir hundaæðisfrí lönd á vef CDC í Bandaríkjunum

Útflutningur til annarra landa

Í flestum tilfellum er hægt að finna upplýsingar um innflutningskröfur á vefsíðum viðkomandi dýralæknayfirvalda (leita að pet import requirements fyrir viðkomandi land).

Önnur gæludýr

Innflutningur búrfugla, kanína og þeirra tegunda nagdýra sem finnast á Íslandi til annarra landa krefst almennt ekki heimildar eða heilbrigðisvottorða.  Matvælastofnun hvetur þó dýraeigendur til að kynna sér kröfur viðkomandi móttökulands.