• Email
  • Prenta

Auðkennismerki og samþykkisnúmer

Samþykkisnúmer 

Fyrirtæki sem framleiða matvæli úr dýraafurðum skulu merkja vörur sínar með auðkennismerki sem innheldur samþykkisnúmer starfsstöðvarinnar.

Matvælastofnun úthlutar samþykkisnúmeri til fyrirtækja sem uppfylla kröfur 853/2004/EB (ísl. nr. 104/2010) í samræmi við 3. mgr. 3. gr. reglugerðar nr. 854/2004/EB (ísl. nr. 105/2010) en þau eru: Matvælafyrirtæki sem framleiða matvæli úr hráum fiski, hráu kjöti og hrámjólk, s.s. fiskvinnslur, sláturhús, kjötvinnslur, mjólkurvinnslur, eggjavinnslur, eggjapökkunarstöðvar og matvælafyrirtæki sem nota slíkar afurðir við framleiðslu á blönduðum matvælum.  Undanskilin er smásala þar sem reglugerðirnar 853/2004/EB og 854/2004/EB gilda ekki um smásölu.   Ef smásali dreifir meira en 1/3 af dýrafurðum til annarra smásala s.s. verslana, veitingahúsa, mötuneyta eða heildsala þarf hann að uppfylla kröfur 853/2004 og fá úthlutað samþykkisnúmeri (rgl. 579/2012).

Matvælastofnun birtir lista á heimasíðu sinni yfir samþykktar starfsstöðvar. Einnig eru listarnir aðgengilegir frá heimasíðu ESB.

Auðkennismerki, 853/2004 II. viðauki 

Samkvæmt 5. gr. reglugerðar nr. 853/2004/EB og II. viðauka hennar skulu matvæli úr dýraríkinu hafa auðkennismerki svo unnt sé að tryggja rekjanleika þeirra til framleiðanda. Þetta á við um hrátt kjöt og hráan fisk í neytendaumbúðum og vörur unnar úr hrámjólk, hráu kjöti og hráum fisk.

Auðkennismerkið skal vera egglaga og í því skal koma fram heiti landsins þar sem starfsstöðin er staðsett (IS eða Ísland),  samþykkisnúmer starfsstöðvar og EFTA. Mælt er með IS þar sem það er alþjóðlegur kóði. Merkið skal vera læsilegt, óafmáanlegt og rittáknin greinileg. 

Auðkennismerkið gefur til kynna að lögbært yfirvald telji viðkomandi leyfishafa uppfylla kröfur Íslands og Evrópusambandsins. Afurðir í umbúðum sem bera slík auðkennismerki eru í frjálsu flæði innan EES svæðisins.

Samþykkt starfsstöð sem framleiðir matvæli úr dýraríkinu og matvæli jurtaríkinu getur sett auðkennismerki á allar afurðir sem framleiddar eru í því húsnæði sem fellur undir starfsemi hinnar samþykktu  starfstöðvar. Kjötvinnsla með samþykki  sem framleiðir grænmetisrétti getur því sett auðkennismerkið á grænmetisréttina.

Pökkun og merking

Sá aðili sem meðhöndlar matvæli úr dýraafurðum síðast og pakkar þeim í neytendaumbúðir skal merkja vöruna með sínu auðkennismerki sem innheldur samþykkisnúmer starfsstöðvarinnar .  Sem dæmi má nefna fyrirtæki A  sem framleiðir skinku og fær fyrirtæki B til að sneiða skinkuna niður og pakka í neytendaumbúðir. Samþykkisnúmer fyrirtækis B  sem pakkar skinkunni í neytendaumbúðir skal koma fram á umbúðum. Fyrirtæki A er þá ábyrgðaraðili vörunnar og þarf nafn þess að koma fram á umbúðum. Fyrirtæki A og B þurfa þurfa bæði að uppfylla kröfur 853/2004 og hafa samþykkisnúmer.

Matvæli úr dýrafurðum s.s.kjöt í bitum, hakk, frosinn fiskur, pylsur og álegg sem er pakkað í kassa eða kör og þau send í mötuneyti eða veitingahús,  til frekari vinnslu eða til pökkunar  í annarri starfsstöð eiga vera með auðkennsimerki starfstöðvarinnar á kassanum, karinu eða í fylgiskjali sem fylgir sendingunni. Auðkennsimerki er staðfesting á þvi að matvælin hafi verið framleidd í samþykktri starfsstöð. Sá sem tekur við slíkum matvælum til frekari vinnslu / pökkunar má ekki taka við þeim nema hann geti sannreynt að framleiðslan hafa farið fram í samþykktri starfsstöð.   Þó ber að nefna að smásali B sem dreifir matvælum beint til neytenda má taka við matvælum frá öðrum smásala A svo fremi sem smásali A dreifi minna en 1/3 af þeim matvælum úr dýraríkinu sem hann framleiðir til annarra smásala. (reglugerð 579/2012).

Auðkennismerki á umbúðum kjöts í bitum eða hakkaðs kjöts sem fer til áframhaldandi pökkunar skal komið þannig fyrir að það eyðileggist þegar umbúðirnar eru opnaðar / rofnar eða umbúðirnar sjálfar eyðileggjast þegar þær eru opnaðar.   Þessar reglur eru settar fram til að koma í veg fyrir dreifingu kjöts sem hefur verið framleitt í starfsstöðvum sem ekki hafa leyfi til þess.