Listería í graflaxi

07.02.2019 Fréttir - Innkallanir

Matvælastofnun varar neytendur við neyslu á graflaxi frá Ópal Sjávarfangi vegna greiningar listeríu (Listeria monocytogenes) í laxinum. Fyrirtækið hefur innkallað graflaxinn af markaði í samráði við Matvælastofnun. Um er að ræða allar vörutegundir af graflaxi frá Ópal Sjávarfangi.

Innköllunin á við allar lotur af Graflaxi frá Ópal Sjávarfangi (bitar, hálf flök, heil flök og sneiðar) sem eru á markaði með síðasta notkunardag í janúar, febrúar eða mars.

  • Vöruheiti: Ópal (allur graflax)
  • Framleiðandi: Ópal Sjávarfang ehf, Grandatröð 4, 220 Hafnarfjörður 
  • Síðasti notkunardagur: Allar dagsetningar í janúar, febrúar og mars
  • Lotunúmer: Öll lotunúmer 
  • Framleiðsluland: Ísland
  • Dreifing: Verslanir 10-11, verslanir Hagkaupa, verslanir Nettó, verslanir Kjörbúðarinnar, verslanir Krambúðarinnar, Melabúðin, verslanir Iceland og verslunin Kvosin

Neytendum sem keypt hafa vörurnar er bent á að neyta þeirra ekki og skila þeim til fyrirtækisins gegn endurgreiðslu. Þeir sem eiga graflax frá því í desember eða janúar í frysti hjá sér, eru einnig beiðnir um að hafa samband og skila honum gegn endurgreiðslu.

Dæmi um vörur

Listeria monocytogenes getur orsakað sjúkdóm bæði hjá mönnum og dýrum og kallast þessi sjúkdómur listeriosis. Einkenni sjúkdómsins eru mild flensueinkenni, vöðvaverkir, hiti og stundum ógleði og niðurgangur. Alvarlegri einkenni eru heilahimnubólga í ungbörnum, blóðeitrun og getur sjúkdómurinn einnig valdið fósturláti. Í einstaka tilfellum getur bakterían valdið dauða, þá er yfirleitt um að ræða einstaklinga sem eru með skert ónæmiskerfi.

Í flestum heilbrigðum einstaklingum veldur neysla á listeríumenguðum matvælum ekki sjúkdómi. Áhættuhópar eru barnshafandi konur, ófædd og nýfædd börn og einstaklingar með skert ónæmiskerfi. Hópsýkingar af völdum listeríu eru mjög sjaldgæfar, oftast er um að ræða einstaklingssýkingar.

Ítarefni

Uppfært 08.02.19 kl. 15:50
Uppfært 12.02.19 kl. 10:57
Uppfært 13.02.19 kl. 19:10



Til baka